Edozein plater prestatzeko eta aurkezteko orduan, nahiz eta erraza izan, osagaien kalitatea bezain garrantzitsua da arreta eta ardura.

• Garbitu barazkiak xehe-xehe kontsumitu edo prestatu aurretik, lur-arrastoak, intsektuak eta hondakin kimikoak suntsitzeko eta elikagaien ondoriozko toxiinfekzioak saihesteko.
• Lurrarekin harreman zuzenean hazten diren barazkiak (azenarioak, errefauak, zainzuriak) arretaz garbitu behar dira, batez ere hostodun barazkiak (letxuga, eskarola...).
• Barazkiak hostoz hosto ur hotzetan garbitzea gomendatzen da, ura desinfektatzeko egokia den lixiba-tanta batzuekin. Ondoren, ur garbiarekin urberritu behar dira behin eta berriz.
• Ez beratu luzaroan, uretan disolbagarriak diren mantenugaiak (gatz mineralak eta bitaminak) gal ez ditzaten. Beratzeko urari substantzia azidoak (limoia edo ozpina) gehituz gero, bitamina batzuen oxidazioa murrizten da.
• Ahal den guztietan, hobe da barazkiak zuritu gabe kontsumitzea, batzuetan bitamina eta bestelako konposatu onuragarri gehiago izaten baitituzte kanpoko eremuetan (adibidez, tomateak likopeno gehiago izaten du azalean mamian baino). Halakoetan, kontuz garbitu behar dira, eta zapi garbi batekin lehortu, partikula arrotzen (hautsa, lurra...) arrastoak eta plagiziden eta tratamendu kimikoen balizko hondakinak kentzeko.
• Zuritu edo moztu ere justu kontsumitu aurretik egin behar da, pardeamendua saihesteko (azenarioak). Hori posible ez bada, limoi edo ozpin zukuarekin bustitzea eta ahalik eta azkarren kozinatzea gomendatzen da.